1974 “తాతమ్మ కల ” చిత్రంతో ఎన్టీఆర్ నట వారసుడిగా వెండితెరకి పరిచయమై తన అద్భుత నటనతో అంచెలంచెలుగా ఎదిగి ” తండ్రికి తగ్గ తనయుడు” గా అందరి ప్రశంసలుపొంది, ఎంతోమంది అభిమానులను సంపాదించుకున్న బాలకృష్ణ సినీ ప్రస్థానం 50 వసంతాలు పూర్తి చేసుకోవడం అరుదైన గౌరవం. నట వారసుడిగా 50 యేండ్లు పూర్తి చేసుకున్న ఏకైక అగ్ర కథానాయకుడుగా కొత్త చరిత్ర కు శ్రీకారం చుట్టారు. తన తండ్రి ఎన్టీఆర్ తర్వాత నేటితరంలో పౌరాణిక, సాంఘిక, జానపద, చారిత్రాత్మక చిత్రాలు చేసి.. అన్ని జనరేషన్స్ ప్రేక్షకులను మెప్పించిన ఒకేఒక్కడు బాలకృష్ణ కావడం విశేషం.
ఈ ప్రతిష్టాత్మక 50 వసంతాల బాలకృష్ణ సినీ స్వర్ణోత్సవ సంబరాలను ఎన్బీకే హెల్పింగ్ హ్యాండ్స్ అధ్యక్షులు అనంతపురం జగన్ బాలకృష్ణ అభిమానులను ఒక టీమ్ గా ఏర్పాటుచేసి 50 రోజుల పాటు పెద్దఎత్తున నిర్వహించాలని సన్నాహాలు చేస్తున్నారు. అలాగే తెలుగు చలనచిత్ర పరిశ్రమ కూడా హైదరాబాద్ లో వేడుకలు చేయడానికి సిద్ధం చేస్తున్నారు. గతంలో ఎన్బీకే హెల్పింగ్ హ్యాండ్స్ ఆధ్వర్యంలో బాలకృష్ణ వందో చిత్రం గౌతమిపుత్ర శాతకర్ణి కోసం 70 రోజుల పాటు భారతదేశ శతపుణ్యక్షేత్ర జైత్రయాత్ర ని చేపట్టి ఒక చరిత్రను సృష్టించారు. అంతేకాకుండా బాలకృష్ణ 60వ పుట్టినరోజు వేడుకలను విశ్వవ్యాప్తంగా ఉండే బాలయ్య అభిమాన సోదరులందరు వారి కుటుంబ సభ్యులతో కలిసి ఒకే సమయంలో తొంభై వేల మందికి పైగా కేక్ కట్ చేసి ప్రపంచ రికార్డును నెలకొల్పి బాలయ్య అభిమానుల సత్తాని చాటారు. ఇప్పుడు మరోసారి మేము ప్రాణానికి ప్రాణంగా ప్రేమించే బాలకృష్ణ కోసం అభిమానులందరు కలిసి అతిపెద్ద పండుగ చేయబోతున్నాం.
