కేంద్రం ప్రకటించిన జాతీయ చలనచిత్ర పురస్కరాల్లో నితిన్ నటించిన కార్తీకేయ-2 ఉత్తమ ప్రాంతీయ చిత్రంగా (తెలుగు) నిలిచింది. నిఖిల్, అనుపమ పరమేశ్వరన్‌, అనుపమ్‌ ఖేర్, తులసి, శ్రీనివాసరెడ్డిలాంటి ప్రధాన తారాగణం నటించిన ఈ చిత్రానికి చందు మొండేటి దర్శకత్వం వహించగా.. 2022లో విడుదలైన ఈ మూవీ బాక్సాఫీస్ బద్దలుకొట్టింది. పీపుల్స్‌ మీడియా ఫ్యాక్టరీ బ్యానర్‌పై టి.జి.విశ్వప్రసాద్ నిర్మించిన ఈ చిత్రం గట్టి వసూళ్లే రాబట్టింది.
చదవండి: జాతీయ అవార్డు పొందిన ప్రాంతీయ చిత్రాలు ఇవే..!
బలగం లాంటి బెస్ట్ చిత్రాలు ఉండగా దీనికే ఎలా..?
వాస్తవానికి ప్రజాదరణ పొందిన చిత్రాలు, మనసుని స్పృశించే కథనంతో కూడిన కథలు చాలా వచ్చినా కూడా కార్తీకేయ-2నే ఎందుకు ఎంపికయ్యింది అన్నది సినీ విశ్లేషకుల మెదళ్లను తొలిచేస్తున్న ప్రశ్న. కార్తీకేయ-2లో నిఖిల్ క్యారెక్టర్ ఓ వైద్యుడు. నిత్యం అంతుచిక్కని ప్రశ్నలకు సమాధానం వెతకడమంటే అతనికిష్టం. అయితే ద్వారాక వెళ్లిన తనకు కొన్ని సంఘటనలు నిశ్చేష్టుడిని చేస్తాయి. ఈ క్రమంలో సాగిన హీరో ప్రయాణం… శ్రీకృష్ణుడి చరిత్ర చుట్టూ సాగుతూ దైవం, మానవత్వం వంటి విషయాలను చెబుతూనే పతాక సన్నివేశాలతో పరిసమాప్తమవుతుంది. అయితే మంచికథే, జాతీయ అవార్డు దక్కాల్సిన సినిమానే అంటూ ఓవైపు కార్తీకేయ-2పై మాట్లాడుతున్న క్రిటిక్స్…బలగం, సీతారామం, మేజర్ లాంటి సినిమాలు అస్సలు పరిశీలనలోకే రాలేదా అన్నది వారిలో వేయి డాలర్ల ప్రశ్నగా మిగిలిపోయింది. నిజానికి తెలంగాణలోని ఓ గ్రామీణ నేపథ్యంతో సాగిన బలగం మూవీ ఏ రేంజ్‌లో ప్రజాదరణ అందుకుందో అందరికీ తెలిసిందే. కుటుంబ విలువలే ముఖ్యమంటూ వచ్చిన ఆ మూవీ.. సెంటిమెంట్‌తో కట్టిపడేసింది. ఇక, దుల్కర్‌ సల్మాన్, మృణాల్ ఠాకూర్, రష్మిక మందన నటించిన చిత్రం సీతారామం…2022లో విడుదలైన ఈ మూవీ స్వఛ్ఛమైన ప్రేమకథతో అందరి మనసులను దోచేసింది. అలాగే, అడవి శేష్‌ నటించిన మేజర్ ఊహించని బ్లాక్ బస్టర్. రియల్ హీరో మేజర్ సందీప్ ఉన్నికృష్ణన్‌ జీవితం ఆధారంగా తీసిన ఈ మూవీ అశేష సినీ అభిమానలోకాన్ని ఆకట్టుకుంది. ఇల్లు, కుటుంబం కంటే దేశమే ఎక్కువగా భావించి భారత సైన్యంలో చేరి ఉగ్రవాదుల కుట్రను ఎలా ఛేదిస్తాడన్నది చిత్ర సారాంశం. మరి ఇంతటి ఘనవిజయాలు, అవాక్కయ్యే వసూళ్లతో ఆడిన ఈ సినిమాలేవి కాకుండా కార్తీకేయ-2నే ఎందుకు జాతీయ అవార్డు దక్కించుకుందనేది చాలామందిని ఆలోచనలో పడేలా చేసింది.
తెరవెనుక బీజేపీ – అందుకే కార్తీకేయ-2కు దక్కిందా?
శ్రీకృష్ణుడి చరిత్రతో తెరకెక్కడంతోనే కార్తీకేయ-2కు ఆ అవకాశం వచ్చిందన్న ఆరోపణలు లేవనెత్తుతున్నాయి. పక్కా హిందుత్వం చూపే బీజేపీ…కార్తీకేయ-2ను ఎంపికచేయడంలో తెరవెనుక పాత్ర పోషించింది అనడంలో సందేహమే లేదంటున్నారు కొందరు. అందుకే బలగం, సీతారామం, మేజర్ లాంటి సినిమాలపై బీజేపీ శీతకన్ను వేసిందన్నది వారి ఆరోపణ.
