పవన్‌ను కలుస్తానంటూ అఘోరీ హంగామా..!
అఘోరీని అరెస్ట్‌ చేసిన మంగళగిరి పోలీసులు..!
గుంటూరు పరిసర ప్రాంతంలో గత కొన్నిరోజులుగా అఘోరీ సంచరిస్తూ హల్‌చల్‌ చేస్తుండటం తెలిసిందే. జనాలకు ఇబ్బంది కలిగించేలా ఆమె ప్రవర్తించడంతో స్థానికంగా ఎక్కడికక్కడ ఆగ్రహావేశాలు వ్యక్తమవుతూనే ఉన్నాయి. ఓ వైపు ఇలా కొనసాగుతుండగా, సోమవారం మంగళగిరి వేదికగా అఘోరీ చేసిన చేష్టలు అందరినీ నిశ్చేష్టులను చేశాయి. డిప్యూటీ సీఎం పవన్‌ను కలిసేంతవరకు తాను వెళ్లేదిలేదంటూ నడిరోడ్డుపై భీష్మించుకుని కూర్చోవడంతో అటు, ఇటు రాకపోకలకు తీవ్ర అంతరాయం ఏర్పడింది.
అయితే ఒకానొక దశలో అఘోరీని అక్కడి నుంచి కదిలించేందుకు పోలీసులు శతవిధాలా ప్రయత్నించారు. జాతీయ రహదారిపై అటుఇటూ ట్రాఫిక్ స్తంభించిపోవడంతో అన్నీ వార్తా ఛానాళ్లలోనూ క్షణాల్లో అఘోరీ వార్త తెలిసిపోయింది. పవన్‌ను కలిస్తేనే ఇక్కడినుంచి వెళ్తానంటూ ఆమె ఖరాకండీగా చెప్పడం, దానికి తగ్గట్టుగా వారించిన పోలీసులపై చేయిచేసుకోవడంతో…ఇక చేసేదేం లేక, ఖాకీలు సైతం ఆమెను ఈడ్చుకెళ్లడం తప్పలేదు. ఆమెను ఈడ్చుకెళ్లి డీసీఎం వ్యాన్‌లోకి ఎక్కించారు. దీంతో గంటల తరబడి స్తంభించి పోయిన హైవేపై ట్రాఫిక్… క్లియర్ అవ్వడమే కాదు, అక్కడ ఉన్నవారంతా ఊపిరి పీల్చుకున్నారు.
