గోవా వెళ్లాలంటే ఇష్టపడని వారుండరు. జీవితంలో ఒక్కసారైనా గోవా అందాల్ని చూసి రావాలన్నది ప్రతిఒక్కరి కల. అయితే ఇలాంటివారికోసం దక్షిణ మధ్య రైల్వే తీపికబురు అందించింది. సికింద్రాబాద్ నుంచి నేరుగా గోవాకు వెళ్లేలా సికింద్రాబాద్ – వాస్కోడిగామా రైలు సర్వీసును వారం రోజుల్లో అందుబాటులోకి తీసుకురాబోతుంది. ఇప్పటివరకు
కాచిగూడ నుంచి సాధారణ, ఏసీ, స్లీపర్‌ కలిపి నాలుగు బోగీలతో వెళ్లే వీక్లీసర్వీస్‌ గుంతకల్లు వద్ద గోవా రైలుతో అనుసంధానమయ్యేది. ఈ నేపథ్యంలో కేంద్రమంత్రి కిషన్‌రెడ్డి గోవాకు నేరుగా రైలు నడపాలంటూ రైల్వేశాఖకు లేఖ రాశారు. ఆయన విజ్ఞప్తిపై సానుకూలంగా అధికారులు స్పందించడం, వారంలో ట్రైన్‌ను అందుబాటులోకి తేనుండటం శుభపరిణామం.
చదవండి: తెలుగురాష్ట్రాల్లో కోల్‌కతా ఎఫెక్ట్‌..!
రైలు సర్వీసు వేళలు ఇలా..!
ఏటా 80లక్షలమంది స్వదేశీ పర్యాటకులు గోవాను సందర్శిస్తుంటే..అందులో 20శాతం తెలుగువారే. నేరుగా రైలులో వెళ్లే సదుపాయం లేక సొంతవాహనాల ద్వారానో, లేక ఇతరత్రా ప్రత్యామ్నాయ మర్గాల్లోనో చేరుకుంటారు. అయితే తాజా పరిణామాలతో ఇప్పుడీ పరిస్థితికి చెక్‌ పడింది. బుధ, శుక్రవారాల్లో సికింద్రాబాద్ నుంచి వాస్కోడిగామకు…అలాగే గురు, శనివారాల్లో వాస్కోడిగామ నుంచి సికింద్రాబాద్‌కు సర్వీసులను అందుబాటులోకి తెస్తున్నారు. టికెట్ ధరలు కూడా రేపోమాపో వెల్లడిస్తారని తెలుస్తోంది.
